Jon Arretxe Gijoneko Aste Beltzean izan da aste honetan, eta genero horretako beste adituekin batera, zenbait libururen aurkezpenetan eta hitzalditan parte hartu du. Basauriarrak Hutsaren itzalak (Erein) lana aurkeztu du Kantauriko hirian, gaztelaniazko bertsioan: Sombras de la nada.
Bada, Gijonetik Bartzelonara egingo du salto, eta hiri horretako Negra y Criminal liburu-dendan egongo da bihar, larunbatean, 13:00etan, lan hori ere aurkezten.
Jon Arretxe berriz ere kontakizun poliziakoaz baliatu da gure inguruan ikusten diren bidegabekeriak eta xenofobiaren orratzak zorrotz salatzeko.
“Toure detektibe-igarlearen hirugarren abenturaren aurrean gaude. Arretxek koska bat estuago egiten du, eta Saharaz hegoaldeko etorkinen egoera gordinean egiten du azpimarra. Hemen ez dago aurreko abenturatan hainbat irribarre, egoera barregarri edo ikerketa absurdorik. Bigarren plano batean utzi ditu oraingoan umorea eta ironia. Paradisuaren ateetaraino iristeko ibilbide nekezkoak, mafien esku-sartze ankerrak, giza legearen etengabeko urratzeak hartzen dute protagonismoa. Hala ere, intrigarik ere ez da falta istorio berri honetan”.
Jon Arretxe (Basauri, 1963) Euskal Filologian doktorea da, Heziketa Fisikoan lizentziatua, eta piano eta kantuko ikasketak ere baditu. Oso ezagunak dira bere lanak: 7 kolore, Tubabu, Oroituz, Ostegunak, Sustrai beltzak, Morto Vivace, Fatum, Xahmaran eta Tangerko ametsak.
