Iñigo Azpitarte zarauztarra da, poeta eta musikaria, kantautore tankerako kantuak idazten hasi zen, baina orain musika alternatiboaren esparrura egin du salto. Horretarako, Indigo taldea eratu du: Oriol Flores, perkusioa ( Trizeps, Sortuko Dira Besteak…) Iker Lauroba, pianoa eta gitarra ( Triki ta Ke, Lauroba) eta Ane Bastida baxua ( Lauroba, Eskandalue).
Bada, Iñigo Azpitarte & Indigo Soraluzeko Gaztelupeko tabernaren terrazan izango dira, irailaren 28an, 13:00etan, Bermut musikala programaren baitan. Zarauztarraren kantuetan songwriter kutsuko konposizioak, jazz-rock tarteak, eta rock garaikidea nahasten dira.
“Abesti gehienek kutsu autobiografikoak dituzte, inguruko munduaren interpretazioa eginez, maiteminak eta desamodioak tartean. Gai hauek jorratzeko bi begirada ezberdin aurki ditzakegu Indigon: batetik, balada intimoek erakusten duten seriotasun eta emozioa, eta bestetik begirada ironiko eta jostagarriagoa”.
