Kontuan hartuta euskararen normalkuntzak ezinbestez behar dituela euskaraz egindako kazetaritza eta, oro har, komunikazio prestu eta modernoa, kalitatekoa, Andoaingo Udalak XXV. Rikardo Arregi Kazetaritza sarirako deialdia egiten du Eusko Jaurlaritzako Kultura Sailaren diru-laguntzaz.
Euskarazko kazetaritzaren kalitatea, bikaintasuna eta berrikuntza bultzatzea da Rikardo Arregi Kazetaritza sariaren helburua. Horrela, bada, urtebeteko epearen barruan egin izan diren kazetaritza-lanen kalitatea eta bikaintasuna jendaurrean aitortzea eta saritzea da sari honen xedea.
Ondoko hiru atalotan banatzen da saria: XXV. Rikardo Arregi Kazetaritza saria; Kazetari Berria saria; eta Epaimahaiaren Sari Berezia.
Lehenengoari dagokionean, 2012ko maiatzaren 7tik 2013ko maiatzaren 6ra bitartean egunkari eta aldizkarietan, agerkari digitaletan edo irrati eta telebistetan euskaraz plazaratu izan diren lanek, hala nola aipatu epe eta komunikabide horietan kazetaritza-lanak plazaratu dituztenek daukate saria eskuratzeko aukera.
Epaimahaiaren Sari Berezia izeneko atalean, 2012ko maiatzaren 7tik 2013ko maiatzaren 6ra bitartean egunkari eta aldizkarietan edo irrati eta telebistetan euskaraz plazaratu izan diren lanek, hala nola aipatu epe eta komunikabide horietan kazetaritza-lanak plazaratu dituztenek daukate saria eskuratzeko aukera. Beraz, Sari Nagusirako hautagaien artetik, epaimahaiaren iritziz bereziki saritu nahi duen irizpide jakin bati jarraituz emango da sari hau.
Lanak entregatzeko orduan, nahikoa litzateke aipatutako argitalpenaren kopia edo emisio-ziurtagiriaren ordez lana aurkezten duenaren beraren zinpeko aitorpena igortzea, argitalpen edo emisio eguna eta komunikabidea adieraziz. Edozeinek aurkez ditzakete lanak, 2013ko maiatzaren 13a baino lehen lanaren sei kopia bidaliz helbide honetara: Andoaingo Udala, XXV. Rikardo Arregi Kazetaritza Saria, Goikoplaza, z/g, 20140 Andoain.
XXV. Rikardo Arregi Kazetaritza saria eskuratzen duenari 9.000 euro garbi emango zaizkio. Kazetari Berria saria eskuratzen duenak 3.000 euro garbi hartuko ditu, eta Epaimahaiaren sari berezia eskuratzen duenari 4.000 euro emango zaizkio.
Hemen dituzue oinarri guztiak.
