Donostiako Dock of the Bay musika dokumentalen jaialdiaren hurrengo edizioa, zazpigarrena, 2014ko urtarrilaren 6tik 12ra bitarte egingo da. Datorren urteko edizio horretan ohiko filmen erakusketaz gain, lehiaketa ere abiatuko dute. Hortaz, bi atal izango ditu.
Lehiaketara aurkeztuko diren lanek, dokumental musikalak beharko dute izan, 2012ko urtarrilaren 1a baino beranduago ekoitziak, eta estreinatu gabeak. 2013ko azaroaren 30a baino lehen bidali beharko dira.
Film luze dokumentalak izango dira; alegia, 50 minututik gorakoak, eta DVD formatuan aurkeztuko dira helbide honetan: Dock of the Bay 7. Prim kalea 59 behea. 20006 Donostia.
Horretaz gain, izen-emate fitxa ere bete beharko da. Sariei dagokienez, lan onenak 2.000 euro jasoko ditu.
Oinarriekin lotutako xehetasun guztiak: dockofthebay.es.
Euskal Zine Bilera
Lekeitioko 36. Euskal Zine Bileran parte hartzeko oinarrien berri ere eman dute. Bilerak jakinarazi duenez, talde antolatzailean kide berriak sartu dira, eta horrek nobedadeak ere ekarri ditu aurtengo edizioan: “(Sariak) oso indartsuak izango dira 1.620 euro eta 1.100 eurotakoak Zuzendaritzan, Ekoizpenean, Gidoian, Argazkilaritzan eta Filmerik onenean. Horrez gain Gazte 22 saria ere izango dugu”.
Lanak DVD formatuan aurkeztuko dira, eta gehienezko iraupena 30 minutukoa izango da. Filmak 2013ko irailaren 10a baino lehen bidali beharko dira. Euskara izango da jaialdiaren hizkuntza, eta azpitituluak ere euskaraz izango dira.
Lanak bidaltzeko: 36. Euskal Zine Bilera. Eusebio Erkiaga Kultur Etxea. R. M. Azkue kalea 5. 48280 Lekeitio.
Informazio gehiago: zinebilera.com.
