Georges Braque Parisen hil zen 1963an, eta bere heriotzaren 50. urteurrena dela-eta, Bilboko Guggenheim museoan atzera begirako handi bat antolatu da. Erakusketa irailera bitartean ikusi ahalko da.
Braque, Pablo Picassorekin eta Juan Grisekin batera, Kubismoaren sortzaileetako bat izan zen, eta papiers colle´s delakoen aitzindaria ere izan zen.
Pintura frantsesaren eredu bikaintzat jo izan da, klasikoen oinordeko eta Bigarren Mundu Gerra osteko abangoardiaren sustatzaile eta XX. mendeko artista garrantzitsuenetako bat.
Erakusketa honetan bere ibilbide osoa eta garai guztiak hartzen dira, Fauvismo aldiko lanetatik hasi eta azkenaldiko lanetara. Guztira 250 pieza ikusi ahalko dira, munduan dauden garrantzitsuenetako batzuk, alegia.
Leku berezia izango dute Kubismo aldiko lanek, kaneforen irudikapenek (1920ko hamarkadakoak) eta bizitzaren bukaerako Varengevilleko paisaiek.
Erik Satie, Pierre Reverdy, Francis Ponge, René Char, Carl Einstein, Jean Paulhan eta beste askorekin harremanak izan zituen artista handi honek.
