Histeria kolektiboak Voces Propias izeneko emakumeentzako ikus-entzunezko tailerra ondu du martxoaren 14tik apirilaren 11ra bitarte, Médicos del Mundo GKEk Bilbon duen egoitzan.
Emakumeek egindako eta emakumeei zuzendutako sormen-komunikazioko egitasmoa da; tailerra doakoa da, eta parte hartu nahi duenak izen-emate fitxa betetzea baino ez dauka.
Tailerrean ikus-entzunezko lengoaiaren oinarrizko ezagutzak jorratuko dira, eta partaideek ezinbesteko tresnak eskuratzeko aukera izango dute, diskurtso propioa sor dezaten.
Guztira hiru orduko bost saio izango dira: “Adierazpide mota bat sortu nahi da, norberaren istorioa kontatzeko gaitasuna izango duen ahots propioa sustatuko duena”. Hala, bideoaren bitartez zainketaren, afektuen eta bitarteko ikusezinen lengoaia eta formak esploratuko dira.
Fikzioan zein dokumentalean eskarmentua duten eragileek zuzenduko dituzte saioak, eta lan-taldeak bultzatuko du.
