Zea Mays laukoteak Da bere disko berria aurkezteko hiru kontzertu egingo ditu egunotan Euskal Herrian: abenduaren 26an, Bilboko Kafe Antzokian:, 28an Tolosako Bonberenean, eta, amaitzeko, 2014ko urtarrilaren 5ean, Gasteizko Jimmy Jazz aretoan.
Bilbotarrek ekoizle batekin egin dute lan estreinakoz Da diskoan, eta ez edonolako produktorearekin. Izan ere, Dave M. Allen ekoizle ingelesa The Cure, Depeche Mode eta Chamaleons taldeekin aritutakoa da. Aiora abeslariak azaldu duenez, iragan udan ezagutu zuten Lekeition Allen: “Txosnetan egin genuen kontzertua, nahikoa ekipo txarra zegoen, baina ahalik eta emanaldi onena egiten saiatu ginen Dave konbentzitzeko”. Ekoizlearekin lan egitea esperientzia “berria, emozio handikoa, eta liluragarria” izan dela nabarmendu du Aiorak.
Diskoak 13 kantu biltzen ditu, eta Tio Pete estudioan grabatu dute Jose Lastra teknikariarekin. Gero, Dave Allenek nahasketa egin du Londreseko Club Ralph-en. Masterizazioa ere Ingalaterrako hiriburuan egin du Andy Hippy Baldwinek. Emaitza bikaina da, elektronikaren eta rockaren esparruetan sustraitutako kantuak; soinua, berriz, ikaragarria.
