Marrazkilarientzako egun beltz hauetan marrazki berriak sortzen dira. Joseba Larratxek (Josevisky) hala egingo du. Gaztezulo aldizkarian, hilero kaleratuko duen sailaren lehen alea duzue Aingurak – edo Zer hartu Ontzitik Itsasoa Harri Bihurtzen Bada. Hau Gaztezuloren 2015eko 11. zenbakietan zehar luzatuko da, ale bakoitzean hasi eta bukatuko diren istorio txikiak uztartuz. Egileak dioenez “istorio arraroak, basamortu psikodelikoan”.
Joseba Larratxe Berazadi (Josevisky) komikigile gipuzkoarra da. Donostian Arkitektura ikasketak egin bitartean Berria, Nabarra eta Aldiri aldizkarietarako kolaborazioak egiten hasi zen. Egindako egitasmoen artean, azpimarragarria da KKLRD lana, Lazaro Yak Boldorekin batera egindakoa. Honetaz gain, Argia aldizkarian hainbat lan plazaratu ditu, eta disko askoren azalak ere egin ditu, tartean Lauroba taldearena.
Bere lan zoragarria zertan den ikusi nahi baduzue sartu hemen: http://josebalarratxe.tumblr.com
