Galtzagorri Elkarteak Gipuzkoako Foru Aldundiaren Kultura Zuzendaritza Nagusiaren babesarekin MarraziOak topaketaren 9. edizioa antolatzen du. Aurten irailaren 11tik 15era egingo da Komikigunean.
Gustavo Puerta literatura eta arte adituak eta Elena Odriozola ilustratzaileak hartu dute jardunaldiak zuzentzeko ardura, lelo honen pean: Kosk egiteko, botatzeko, lardaskatzeko eta are irakurriak izateko moduko liburuak egin. Haur txikientzako liburuak sortzeko tailerra.
Astebeteko lantegi intentsibo honetan, haurrentzako liburuak ilustratzeko teknika, genero eta estrategia ezberdinen inguruko formazioa eskaintzen zaie urtero aukeratutako ilustratzaileei. Aurten honakoek hartuko dute parte: Olaia Martinez, Saioa Burutaran, Maite Gurrutxaga, Anaitz Igoa, Ibon Markaida, Ainara Altuna, Ainara Azpiazu (Axpi), Helena Azkarragaurizar, Izar Etxeberria, Yolanda Yubero eta Iñaki Martiarena (Mattin).
“Aurreiritzi hori oso errotua dago. Baina, posible al da haur txikientzako beste era bateko liburuak sortzea? Zertarako egin liburuak oraindik irakurtzen ez dakitenentzat?”. Horra hor hausnartzeko galderak.
