Nontzeberri webguneak Kalesound Maketa Lehiaketa jarri du martxan.

Nahi duen taldeak edo bakarlariak parte har dezake lehiaketan, jaioterri eta bizilekua direnak direla. Derrigorrezko baldintzak honako hauek dira:

- Kantak euskaraz izatea.

- Diskoetxe komertzial batean diskorik argitaraturik ez izatea.

- Kantak originalak izatea
ez bertsioak.

Bi atal daude: Pop-Rock eta Metala. Parte-hartzaileek horietako batean eman beharko dute izena.

- Pop-Rocka: Rock, Pop, Punk,
Rock & Roll, Ska, Hip-Hop, Rap, Reggae, Noise, Rhythm'n'Blues, Tekno Pop, Garage, Power Pop eta abar.

- Metala: Heavy metal, Thrash, Gotikoa, Doom, Rock gogorra, Hardcore, Death, Speed Metal eta abar.

Lanak webgunean dagoen formularioaren bidez, e-postaz edo posta arruntez bidali daitezke.

E-postaz bidaliz gero, talde edo bakarlari bakoitzak hiru mp3 bidali behar ditu kalesound@kalesound.com helbidera.

Horretaz gain, kolorezko argazki bat (.jpg formatuan, gutxieneko neurria
300 x 400 pixel -alturera x zabalera-), biografia (100 hitz gehienez ere) eta harremanetarako modua (webgunea,
e-posta, telefono-zenbakia...) ere
igorri beharko ditu. Baita taldearen izena, herria eta kategoria (metal
edo pop-rock) ere.

Posta arruntez bidaliz gero, CD batean (mp3 formatuan beti ere) honako helbide honetara: Nontzeberri,
Simon Bolivar 8-b, 48010 Bilbo.

Lanak jasotzeko epea 2007ko uztailaren 6an (eguerdiko 12:00etan) amaituko da.

Musika arloko hiru adituk erabakiko dituzte sariak. Lehiaketak honako sari nagusi hauek banatuko ditu:

• Pop-Rockeko onena
• Metaleko onena
• Pop-Rockeko semifinalistak
• Metaleko semifinalistak

Irabazleek Plateruena Kafe Antzokian joko dute kontzertu banatan, Plateruenakoek eurek programatutako beste talde batekin edo gehiagorekin batera. Kontzertu hauek antolatzeaz Plateruena kargutuko da.

Bestalde, irabazle bakoitzak 1.500 euroko diru-saria jasoko du, Durangoko Txirula musika dendan gastatzeko.

Atal bakoitzeko bigarren eta hirugarren sailkatuek Bilboko Bilborock aretoan joko dute. Kontzertu bi programatuko dira (bata metalen, pop-rocken bestea) eta sailkatuek elkarrekin joko dute. Uda osteko kontzertuon datak zehaztu gabe daude.

Sarietako edozein gerta daiteke eman gabe gelditzea, epaimahaikideen iritziz aurkeztutako kantek behar adinako mailarik ez baldin badute.

Parte hartzeak esan gura du parte-hartzaileak aitortzen duela bidalitako kanten autorea dela. Nontzeberrik oinarri hau ez betetzearren sor litezkeen erantzukizunak ez ditu bere gain hartuko.

Sariak lehiaketa amaitu eta egun batzuetara jakinaraziko dira. Irabazleen berri emango da webgunean eta parte-hartzaile guztiei komunikatuko zaie epaimahaikideen erabakia.

Epaimahaiaren erabakiak behin betikoak eta aldaezinak izango dira.

Parte hartzen dutenak Nontzeberriren KaleSound atal finkora sartuko dira lehiaketa amaitutakoan.

Lehiaketan parte hartzeak esan gura du egileak oinarriok onartzen dituela.